"Okay ka na dito? Iwanan na kita ha. Nasa kabilang kanto lang ako nakatira, puntahan mo ako sa day-off mo." Anang tatay ni Alvin pagkahatid sa kaniya sa quarters ng water station kung saan siya magtratrabaho.
Tumango siya. "Salamat, 'tay."
Tumango din ito saka umalis.
Inilibot niya ang kaniyang paningin sa loob, sabay buntung-hininga.
Sigh of relief? No.
It was an empty sigh.
Ilang taon na ba siyang sumusunod lang sa agos ng buhay?
Ilang taon na ba siyang palipat-lipat ng tirahan at trabaho?
Hindi na niya mabilang.
Hindi ito ang unang pagkakataong nakarating siya ng Baguio City. Ngunit ito ang unang pagkakataong magtratrabaho siya dito.
Muli siyang napabuntong-hininga. Isang panibagong simula nanaman ang nakatakdang maganap sa kaniyang buhay.
Kung anumang kapalaran ang naghihintay sa kaniya dito, ipinapaubaya na niya sa kaitaasan.
Ilang oras pa ang lumipas at nagpatangay na siya sa kalaliman ng gabi at sa malamig na ihip ng hangin. Maaga pa siyang magtratrabaho bukas.