Chapter 1: Dendam Bujang Berani"Nyidi"
#Bujang_Berani_Kempang
#Ensera_John_Enggau_Anak_Jagu
Tajuk;"Dendam Bujang Berani" ( Nyidi)
Dikarang:#John_Jovi
Diseruri; John jovi
Tusun 1..
Bisi siti menua disebut kitai "Bukit kelingkang". Siti menua ti nyadi sejarah ba menua Bagi ke 2. Agi kelia "Bukit Kelinkang" alai endur bansa kitai iban kelia bepantap bebunuh ke pangan dri. Maya nya suba bisi siku lelaki lari mai bini iya ti benung ngandung sarat, nganti deka beraniak da.
Tang mih seduai iya melaki bini enda sempat lari jauh ari menua diri laban ditemu musuh ba tengah jalai ba Tuchung Bukit Kelingkang. Seduai iya melaki bini lalu dibunuh musuh, laki iya lalu dipantap ba pala,bini iya mina dipantap ba belah tubuh.
Tang bai nasit Bini iya agi ulih melat ke diri ari tuchung Bukit Kelingkang,dia dih indu nya enda ngira diri mati tau ka idup, Laban pikir iya asal anak ba perut iya selamat. Musuh meda iya gegaring sereta melat kediri, dia dih bala musuh belanda deka munuh indu nya sekali lalu terus deka ngambi pala iya ka dibai sida pulai ke menua. Tang mih sida enda sempat deka mumpung pala indu nya laban iya muai diri ke arung Bukit Kelingkang.
Anci peningi Bukit Kelingkang endur indu nya muai diri. Tang mai ati berani dia dih indu nya muai diriDatai ba baruh kaki Bukit kelingkang, dia dih iya pan enda nemu diri. Dipelaba ke bala musuh iya sigi mati nadai orang ulih idup maya labuh ari Bukit Kelingkang. Tang munyi ku jaku kitai iban kelia,Antu dibaruh dagu. Petara ba atas pala. Baik nasit indu ka ngandung nya deka ngada ke anak iya.
Datai siku apai tuai orang kebenung bejalai begiga ke jelu babas, dia dih apai tuai nya tepeda kesiku indu kebenung gegaring, tubuh abis dibalut darah tanda baru udah dipantap orang enggau duku. Meda pia, dia apai tuai nya lalu beguai nuju indu ke benung gegaring ba tanah.
Enda cecamang apai tuai nya lalu ngangkat ngalih ke indu nya. Dia apai tuai nya meda mua indu nya baru udah dipantap orang,mua bekecabik abi duku. meda indu nya nadai nemu orang agi. Apai tuai nya lalu ka ngengkah ke indu nya ba tanah.
Baru aja iya ka ngengkah keindu nya, dia apai tuai nya ngasai ke bahu iya dipegai orang. Malik apai tuai nya ke bahu, dia iya meda jari indu nya megai bahu iya. Indu nya lalu encelak ke mata iya mimit,semuti ke ulih meda orang aja. Utai dipeda enyau kerabur, sebedau indu nya deka madam keseput iya dia indu nya minta tulung apai tuai nya..
----Jaku indu nya munyi tu----
Aaaaya...!!! terima kasih aaya, nuan udah nulung aku. Sebedau aku deka mutus ke seput aku diatu,tulung aku aya. Anak dikandung aku ditu deka ada.Tulung tekan perut aku aya, kasih keanak ku deka meda menua nyata.
---Apai Tuai nya lalu jampat nyaut jaku indu nya----
Apuuu..!!! Endu..!! bakani aku nulung nuan dih anak. Udah ga nuan enyau jejengap baka ni nuan ulih neran ke anak nuan nya legi. Kasih ukai enda kasih aku meda nuan anak. Tang bakani nih endu jalai aku nulung nuan.
------Indu nya lalu nyaut----
Aaaya..!!! Tekan nuan aja perut aku Aya, anak ba perut aku udah deka ada da. Tuuulung aku Aya, kasih mih ke anak aku..
Enggau ai mata mih tudah indu nya minta tulung iya. Ninga indu madah munyi nya. amat te pejam encelak mih tudah apai tuai nya nekan perut indu nya. Tu mih terubah aku nekan orang indu beranak, pia ku ati apai tuai nya bejaku dalam ati diri.
kira bisi 3 kali apai tuai nya nekan perut indu nya. Anak mit nya pan lalu ada. Ada anak mit nya tadi lalu nyabak, nangka pemesai bunyi nyawa anak mit ke nyabak. Indai anak mit nya udah ngada ke anak mit nya. Dia indu nya lalu ngasuh apai tuai nya ngambi kain ke ditudung ba pala.
Apai tuai lalu ngangkat kepala indu nya, apai tuai nya lalu bejampat ngambi kain ba tubuh indai anak mit nya lalu terus dibalut ke ngagai anak mit indu tadi. udah Apai tuai nya tembu malut anak iya ke tadi, indai anak mit nya lalu madah ke apai tuai nya.
----Jaku indai anak mit----
Aaaya..!!! Udah tu legi bai nuan anak aku aya, nadai tusu kena nuan nupi iya. Ai asi ga kena nuan nupi iya. Anang mih nuan aya enda ngidup ke anak aku. Ila udah iya besai baru nuan nusi jerita khesah aku enggau apai iya. Nyadi Aaya.. Nama aku Dara. Anak indu sigan orang sigi pematak kayau.. Apai iya Benama Amit, anak lelaki utu. Orang digelar kaya batang kelingkang, laban iya mayuh reta lama kelia.
Udah parai niang Entua enggau Niang apai kami. Semua kami nadai orang agi nyaga menua, Berapa taun kami nadai orang ngetan kemenua enggau bekunsi penemu. sari tu rumah panjai kami enggau kami serumah, Abis mati. Rumah panjai kami lalu ditutu bala musuh.
Bisi kedua ulih ngerari ke diri,laban betul niti jalai lari. Nyadi aku enggau laki aku laban nengah jalai mati. kami duai melaki bini betemu enggau musuh ba tengah jalai. Laki aku mati dibunuh musuh, aku melat kediri lari ari atas Bukit Kelingkang tu. laban aku enggai ditetak bala musuh pala. Nya aku aku sanggup mati munuh diri ari aku mati dipumpung musuh pala.
laban aku deka nyelamat ke anak dikandung ke aku tu. Nasit petara agi meda kami menyanak dia petara nganjung nuan Aya ngambi bisi meda anak aku tu. Diatu anak aku udah ada, ati aku cukup gaga. Ngambi ila iya ulih (Nyidi) Bebalas dendam ke pemati tua apai iya kesari tu.
lalu diberi nuan nama (selanggan.) Udah iya besai ila. (Umpang) digelar Bujang Berani. Laban ila iya sigi enda nyerah alah enggau bala musuh nang sigi enda mudah rarat ngapa. Seagi seput iya bedau ba Dada. Awak keiya ila digelaar (Bujang Berani)
Udah indai anak mit nya abis bejaku,Apai tuai tuai nya lalu malik mua indai anak mit nya. peda Apai tuai nya indai anak mit nya lela baka padam api kelita. Enda berasai ai mata apai tuai nya labuh ngenang siku mensia sanggup ngada ke anak dulu sebedau seput iya padam. Dia apai tuai nya lalu bejaku enggau bangkai indai anak mit nya..
-----Jaku Apai tuai nya munyi tu----
Dehh..!! dah anak, sinu aku ngenang nuan endu,semuti ke ulih meda anak mih nuan. Enda sanggup aku meda pemati nuan bakatu. Cukup kempang ati mensia bebunuh ke bansa diri. Ketegal ngiga rita. Anak mensia abis pupus.
'------Bertampung ba tusun 2
Dikarang; Dom JJ ( John Jovi)
19/02/2020