Tales of Celeste

Isang misteryosong lagusan ang bigla na lamang gumimbal sa tahimik na pamumuhay ng mga mamamayan sa mundo ng Albion. Nababalutan ito ng itim na mahika at aura na nagdudulot ng matinding panganib. Dahil dito ay agad na tinipon ni Haring Qesien ang pinakamalalakas na mandirigma sa kanilang mundo. Sa pangunguna ni Prinsipe Astro, ay naglakbay na sila patungo sa Camptarel Haven. Misyon nila na masugpo ang kadiliman, at tuluyang maisara ang lagusan.

Sa hindi inaasahang pagkakataon ay napabilang si Trese sa grupong ito. Isa lamang siya sa libo-libong mga alipin na pinagkaitan ng lakas sa mundo na punong-puno ng hiwaga at mahika. Ganoon pa man ay nanatili siyang mapagkumbaba at may pagmamalasakit sa kapwa.

Ginawa ni Trese ang lahat, makasama lamang ang lalaking itinitibok ng kaniyang damdamin. Ngunit sadyang malupit sa kaniya ang tadhana. Sa pagbabalik ng mga naburang alaala, handa ba niyang isakripisyo ang mga mabibigat na tungkulin para lamang sa inaasam na kalayaan at kaligayahan? O babalik siya sa tunay niyang katauhan?